ڕۆژا چارشەمبی ڕێــککەفتی (٢٦ / ٣ / ٢٠٢٥) ب ئامادەبوونا سەرۆكێ زانكۆیا زاخۆ ڕێزدار (پ.د. دیار عبدالكريم سعيد) پرۆگرامێ (بەخشینا ژیانێ) یێ خێرخوازی ژلایێ کۆلیژا پزیشکی ل زانکۆیا زاخۆ هاتە ڕاگەهاندن، کۆ تێدا پتر ژ (٢٠٠) كەسان دێ مفای ژێ بینن.
سەرۆكێ زانكۆیا زاخۆ دایە دیاركرن: كۆ ئێك ژ ئارمانجێن سەرەكێ یێن زانكۆیێ هەماهەنگی و مفا گەهاندنە بۆ جڤاكی، لەورا زانكۆیا زاخۆ دێ بەردەوام كار و چالاكیێن ساخلەمی و زانستی و كەلتووری و پەروەردەیی دناڤا جڤاكی دا ئەنجامدەت.
پاشان؛ ڕاگرێ كۆلیژا پزیشكی بەرێز (پ.د. نوفل رشید حسین) دیاركر: كۆ ئەڤی پرۆگرامی دو ئارمانجێن سەرەكی هەنە، یا ئێکێ ژبەركو زانكۆ ب گشتی و کۆلیژا پزیشكی ب تایبەتی پشکەکە ژ جڤاکی لەوڕا دێ گرنگیێ ب هاریکاریکرنا جڤاکی دەین ژلایێ ساخلەمی ڤە، ئارمانجا دویێ گەهاندنا پێدڤیێن ساخلەمی و دەرمانان بۆ کەسێن پێدڤی یە.
هەژیە بێژین؛ ئەڤ هاریکاریە دێ ب دو ڕێکان گەهنە کەسێن پێدڤی ئەوژی ڕاستەوخۆ و هەروەسا دەرمانێن گرانبها دێ بۆ نەخوشخانێ هێنە هنارتن و خەلک ل نەخوشخانێ دێ مفای ژێ وەرگرن.